Kenmerkende aspecten:
Overzicht van alle tijdlijnen
Overzicht van alle transcripties
Overzicht van bron(nen) op de kaart
Eersame discrete goede vrunden desen dient omme uluyden
te adverteren, dat ick ernstelijcke beghere, immers
van wegen zijner Fürstliche Genade lasten ende wel expresselijcke
bevele, bij peyne van zijne Fürstliche Genade hooghste ongenade
dat ghijluyden aengesiens desen in aller ijle sult uut u
beyder gemeente tsamen ofvaerdigen ende scicken
hondert eer meer als minder mannen tot scantsgrave
naer Alcmaer, omme d begonnen fortificatie te helpen
met aller vlijte volmaecken ende verstarcken, daer
toe kiesenden die alder goetwillichste, die den
gemeene zaecken meest toegedaen zijn, als ick oock
nyet en twijfele oft ghij sultet best daer inne wel
doen ende continueren u luyden oude getrouhen, dien ick
tzijnre tijt wel dencke te recompenseren, want die
bewaringe ende preservatie vande stede Alcmaer
nyet alleenlijck voor den omleggende dorpen ende ingesetenen
vandien zeer nodich ende profijtelijk is. Ick laet
staen dattet welvaren vant gehele lant daer
aen gelegen is. Daeromme ghijluyden zijner Fürstliche Genade mij,
ende tgemeene lant grote diensten zult doen. Dus
zijt van desen ter volcoemen in gheen gebreecke
God bevole, in haeste tot Scellincwoude desen
XVIIe augusti 1573
u lieder goede frunt
Diederich Sonoy
Gheven zeer ootmoedelijcken te kennen u Furstliche Genade
onderdanighen dyenaeren Bartholomies Symonsz., Schotgen Coemen,
Jan Miesz., Aelbert vanden Nooll, Thyman Ghijssen, Koren kindt
ende Willem Florysz. con socii, hoe dat zij supplianten duer dyen tleger
van u Furstliche Genade tot Egmondt Bynnen leyt, ende daegelijcx groote costen
moeten lijden duer dyen dat zij supplianten den soldaeten ofte knechten
tot Egmondt upten Hoeve den cost gegeven hebben den tijt van omtrent
vii weecken ende noch daegelijcx den cost moeten geven ende boven-
dyen noch daegelijcx haer coeyen ende paerden genoemen verden
vanden Spaenjaerden ende, zoe zij supplianten zijn schaeme huysluyden
dyen all up gehuyert lant sitten, hebbende huer landen tot
groote hoeghe prijse vanden rentmeester van Egmondt
gehuyert, nyet weetende waermede den supplianten haer achtelley[cken]
huyere zullen betaelen noch oock mede gheen gelt en weeten
te crijgen omme andere beesten te coopen. Zoude daer
omme versoecken dat u Furstliche Genade gelieve aen te sien
den supplianten haer armoede ende groote costen dyen zij daegelij[cx]
moeten lijden, den supplianten te ontslaen vanden huyere van haer
lant dat zij hebben, ende voorts den supplianten te gonnen een
redelijcken tijt omme haer versoy achterstallyge huyere te
betaelen. Dit doende etc.
Die Prince van Orangien, Grave van Nassou etc.,
Heere ende Baroen van Breda, van Diest etc.
Eersame vrome lieve bezundere. Alzoe
wij vernomen hebben met wat vlijt ende neersticheyt
ghijlieden die fortifficatien der stede van
Alckmaer hebt gevoirdert, en hebben wij nyet
willen laeten u lieden daer van d te bedancken.
Ende alzoe die zelve stadt nu naest den
vijandt gelegen is ende dat men nyet en kan geweten
wat de vijandt ter handen nemen zal, daer
hij die overhandt over die goede stadt Haerlem
behielde, soe hadden wij goet gevonden Jonckeren
Jacques Cabeliau ter superintendentie der
zelver stede van Alckmaer te stellen ende hen
te bevelen van stonden aene met een vendel
inder voorseide stede van Alckmaer te trecken,
twelck wij oick ons bedunckens u lieden doen
ter tijt gescreven hebben. Waer up nochtans
wij verstaen ghijlieden eenighe zwaricheyt
maekt, alzoe u lieden dunckt datter noch
gheen dangier is. Maer alzoe wij goet
vynden bij tijde alle periclen te precaueren, is
andermael ons begeren u lieden des nyettemin
versouckende bij desen dat ghij sonder voirder zwaricheyt
te maecken den bovengenoimpden Cabbiliau met
zijn vendel knechten binnen der stede van Alckmaer
laet trecken tot verzeeckertheyt der zelver ende
van u lieden elck int bezundere. Ende daer
wij u wijders eenighe hulpe ofte bijstandt
gedoen connen en zal tzelve aen ons nyet gebreken.
Eersame vrome lieve bezundere.
Noch vande soldaten die de stede betaelt
heeft voir vier maenden inde
plaetse van haer derdeman meer als
andere stede ofte dorpen daer die
stede wel te coste off gehadt heeft iiiim g.
Somma lateris xxxiim g.
Op het Huis te Schagen, 11 september 1573.
Werdt van wegen zijnen Furstliche Genade geauthoriseert ende belast Cornelis
Jansz. vanden Nijeburch, dijckgraeffve van Geestmerambocht,
die huyssen van Jan Buyes bijden overthoom ende alle anderen
daerontrent aenden Hugendijck te doen aen brant steecken, de
zelve huyssen met alle datter inne is, ghevende tot prijs, insgelijcx
tgehele dorp van Outdorp ende allen dijcken daerontrent
deur te doen steecken tot ontsettinge der stadt van Alcmaer.
Bevelende hopman Corput met zekeren scutten ende allen anderen
onder den soldije van zijne Furstliche Genade zijnde, in desen alle hulp ende
bijstant te doen, op peyne van zijner Furstliche Genade hoochste
ongenade. Actum opt huys tot Scagen desen xien septembris
1573.
Diedrich Sonoy
Noch een soldaet genaempt Antony ende
heeft gelogeert geweest tot Adrian
Philips, up die Coeninxsech ende
daernae int Middelhoff int
brouwhuys, is geschoten geweest beneden
in sijn bien en is gadt gewerden,
soo groot dat ment met geen halven
hant bedekt souden hebben allereert hem
tot heelen conden nemen ------------ vii gulden
Noch IJsbrant Jacopsz., busschieter -------------- 3 gulden
Noch Ernst Stuking ----------------- 8 gulden.
Noch die Spanjaert, die int pesthuys
lach, gemeestert twee sere duimen,
daer hij aen hadde gehangen ende
sijn armen ende schuederen waeren vul
pijns. Daeran verdient ------------ iiii gulden.
Eersame mijn besondere goede heeren. Nae alle vriendelicke
salutatie zoe zal u Edele believen toe weeten hoe dat
Maerten Pietersz., die over langhe tijt uut Alcmaer ghe-
comen is, weder om veel diversche reysen gedaen heeft
om weder binnen Alcmaer te comen. Zoe heeft hij dat selfde
niet konen becomen om dat selfde te volbrengen overmits dat
hij niet kan suemmen, zoe heeft hij dat selfde moeten laten.
Soe en heb ick niet konen laten om an u Edele te schrijven
overmits dat Maerten zekere missciven van zijn Furstliche Genade, Diedrich
Sonoy ende die heere Van der A an u Edele hadden, ende die selfde
briefven heeft hij van hem gewirpen zoe als hij zeydt
dat hij in een sloet op die Achtermeer was geraeckt dat
hij meende verdroncken te hebben, ende was al deur die
sciltwacht gecomen, zoe dat die perykel al gheleden was van
die vijandt, soe dat wij ons niet genoich conen verwonderen
van die grote slechticheyt die daer in gepleecht is, want
alzoe dat selfde met grote zorge is, dat die vijandt die
briefven gecregen sal hebben, want hij weet niet te seggen waer
dat hij die selfde van hem heeft gewirpen. Voerts zoe
sende ick u Edele die copie uut die brieff, ofte messcive
van die Prince zijn Furstliche Genade, die Maerten Pietersz. verloren
heeft daer ick copie af hilde of daer eenighe foute mochte
comen zoe alst nu gebuert is, dat wij altijt copie over soude
moghen zenden an u Edele, dan van die ander briefven heb ick
gheen copie af, dan Joncheer Diedrich Snonoy is dat zelfde ghe-
schreven hoe dat daer ghevaren is ende men heer Van der A
die is met mijn broeder Aelbert noch tot Delft bij zijn
Furstliche Genade die wij alle daghen verwachtende zijn. Zoe hoepen
wij in God belieft u Edele van als over te schrijven.
Ick Diedrich Sonoy, lieutenant ende gouvernuer van
Enckhuysen, Hoorn ende tgeheele Waterlandt mit alle
tgeene datter ancleeft van wegen mijns Genadige Heeren
die Prince van Oraengien, Grave van Nassou,
stathouder ende capitein generael der Coninclijke Majesteyt
over Hollandt, Zeelandt, Westvrieslandt ende Uuytrecht etc.
Gebiede ende beveele van weegen sijn Furstliche Genade Corne-
lis Jansz. vander Nieuborch, dijckgrave over Geest-
merambacht, Schaege ende Nyriper Cogge, dat hij alle ende
eenen igelick bisonder, als schouten, burgermeesteren,
waerschappen ende medemakeren van steeden ende dorperen
van stonden an, ansiens deses sonder eenich vertreck
eenen igelijck in den stijnen belaste te vergaederen
den derden man omtrent Alckmaer, mit zijn behoerlij-
ke [ge]weer, ofte die geen geweer en hebben, hunluyden
geweer te doen geven van die geene die thuys blij-
ven werden, omme dieselffde mit bij onsen crijsvolck
te voegen, ende te wederstaen onsen erff vijandt, die
(soe wij verstaen) altehans omtrent Harlem
zijn leger geslagen heeft. Voorts dat sij zo voele
wagens mit paerden zullen mit haer brengen,
als den voirnoemde dijckgrave haer belasten zal, om-
me allerhande victualie ende anders daerop het leger
nae te voeren. Belaste ende bevele daer beneven
allen ende eenen igelijken besonder, den voirnoemde dijck-
grave in alles voirseid gehoorsam te wesen ende au-
dientie te geven gelijck off ick persoonlicx selffst
daer waer. Ende bij gebreke van dien, gelave ick
die contraventuers, ende onwillige also te straffen
dat het haere vrouwen ende kinderen over vijfftich
jaeren beschreien zullen. Oirconde deses heb ick
mijn gewonlijke handt ende angeboren pitzeer
hieronder gestelt. Tot Hoorn den xiiii decem-
bris, anno XVC LXXII.
Diedrich Sonoy
