- Willem bider genaden goids Palensgraue upten Rijn Hertoge in Beyeren Grave van henegouwen van hollant van zeelant ende here van vrieslant doen cont allen luden want onse goede lude ende gemeyn burgery van
- Scagen mit sulcken zwacken regimente ende rechte als tot hier toe inden lande aldaer gehantiert heeft geweest hem selven niet regieren noch gedoen en mogen tot hoiren ende ons dorp oirbar. So hebben wij
- om oetmoedichs vervolchs wille onser goede lude voirnoemd om dienst wille die si ons tot menigen tiden mit horen lieve ende goede willichlik gedaen hebben ende oft gode wil noch doen sullen ende sonderlinghe
- om hunbiden in saligen ende betren regimente te bringen den selven onsen goeden luden die nu sijn ende namaels wezen sullen gegeven ende geven mit dezen tegenwoordigen brieve sulcke vriheden
- ende punten van poortrecht als hier nagescreven stait inden eersten sullen wij uut vijftich die rijcste knapen van Schagen kiesen of doen kiezen alle jair zeven scepenen ende twee raden ende die
- sullen eerst drie jaer lanc an een poorter aldair geweest hebben eer si scepenen off rade wesen sullen mogen. Item wanneer men binnen onse stede van Schagen pacht ende scot rekenen sal so sullen
- onse rade ende scepenen aldaer elcx enen goeden man vanden rijcsten aldaer tot hun nemen ende die achtien sullen te samen pachten ende tot rekenen bi horen eede die hem onse scout aldaer stalven sal
- ende men sal niet pachten dan tot elken vijf jaren eens uutgenomen enen nuwen poorter die mocht men pachten als hi poorter geweest is twee jaer end wil onse scepene die pachtinge langer beiden dat
- machs doen. Item sullen onse rade tscot ontfangen ende weder uutreykenen ende dair rekeninge of doen als dair toebehoirt. Ende die selve rade mogen enen goede man alse waerscep uutsenden inder stede
- bootscipper bi ons off bi onsen rade als si van ons gedaecht of ontboden worden of dat si selve bi ons om nutscip onser stede te doen hebben. Item so sal onse scout en de scepenen te rechte sitten ende vierscaer
- houden binnen onser stede van Scagen in tien roeden naden kerchove dair men geen taveerne en hout. Item so sal die vrihede van onse stede voirscreven gaen also verre als haer banne up dese tijt strect.
- Item en blijven niemant die binnen onse stede vriheden van Scagen woenachtich is gebieden van ons wegen gelt te lenen oic en sal men onse stede niet versetten noch gelt daer op lenen
- noch lijfrenten dair op vercopen in geenre manieren. Item so en sal men genen kerff geven op onsen poorteren van Scagen voorscrheven dan van dootslagen ende dairaf sal elck afterzusterkint geven
- vijf scellinge ende niet meer naerre ende verrer elcx na hueren (be)loop. Item sullen alle hantvesten die onse goede luden van Scagen hebben van onsen voorvaderen saliger gedachten ende van ons tsi
- van bruggen, van dijck, ende dijckaedze, tienden ende visscherien an hoire volcomenre machte bliven. Item so hebben wij onsen goeden luden ende poorteren voirscreven vorder sulcke gracie gedaen ende
- doen mit desen brieve voir ons ende voir onsen nacomelingen hem genen nacomelingen dat si voiren allen desen voirscreven poincten niede(voordeel) hebben ende gebrucken sullen sulcke vriheden privilegien ende
- hantvesten van rechte als onse getruwe stede van Scellinghout van onsen voirvaderen ende van ons vercregen hebben. Ende alle puncten diere voir niet gescreven en staen sullen si berechten na
- inhout hoire hantvesten die si van onsen voirvaderen ende van ons daer of hebben behoudelic ons van onsen goeden luden voirnoemd sulcken heervairt ende dienst als wij eertijts van hem gehadt hebben.
19. Ende wij sellen in onser stede van Scagen alst ons genoegen sal enen goeden man tot onsen scout te wesen aldair setten ende die sal voir het zeventuuch die boete nemen twee ende veertich scellingen
19. Ende wij sellen in onser stede van Scagen alst ons genoegen sal enen goeden man tot onsen scout te wesen aldair setten ende die sal voir het zeventuuch die boete nemen twee ende veertich scellingen
- Ende want wij voir ons ende voir onsen nacomelingen onsen poorteren van Scagen ende allen hoiren nacomelingen alle dese voirscreven previlegien bisonder vast ende gestade houden willen ende van
- enen ygeliken gehouden willen hebben onverbroken tot ewigen dagen. So hebben wij in kenisse hier of onse zegel an dese brieve gehangen. Gegeven tot Canoyt den twaleffden dagh in
- meye int jair ons heren duijsent vier hondert ende vijftien
